२०८२ को भविष्यफल

वेदवेदांग धर्म संस्कार संस्कृतिको रक्षा विद्वान्‌हरूको जमघट राष्ट्र/राष्ट्रियताबारे एकता, सद्भाव सहकार्यमा अग्रसर गराउने काम गर्नेछ। वैरभाव अन्त्य गर्दै मेलमिलापमा बल पुर्‍याउनेछ।

यस वर्ष सिद्धार्थीनाम संवत्सर परेको छ। संवत्सरको फल भने शुभ रहनेछ। यष वर्षको राजा सूर्य हुने, मन्त्री पदमा चन्द्रमा छन्। सूर्य र चन्द्र परस्पर मित्रग्रह हुन्। राजा र मन्त्रीको मित्रभावमा गठित ग्रहरूले आ–आफ्नो जिम्वेवारीमा दत्तचित्त भएर काम गर्नेछन्। यो नेपालका लागि ऐतिहासिक वर्ष यसकारण बन्नेछ कि दुवै ग्रह नेपाल र नेपालीको हितमा काम गर्न तत्पर रहनेछन्। नेपालको राशिदेखि नवौं र दशम घरको मालिक नै राजा र मन्त्री बनेका छन्।

वर्षारम्भको लग्न र ग्रहस्थिति

वर्षफल बनाउँदा वर्षको राजा मन्त्री वर्षारम्भको लग्न, लग्नको मालिकको अवस्था पनि महत्वपूर्ण हुन्छ। यी सबैलाई हेर्दा यस वर्ष वर्षारम्भ मेष लग्नमा भएको छ। लग्नमा पञ्चमेश सूर्य उच्च भई बसेको छ।

भाग्येश तथा द्वादशेश गुरु द्वितीय भावमा, सप्तममा चतुर्थेश चन्द्रमाको शुभ प्रभाव छ। सूर्य, वृहस्पति नेपाल देशको द्वितीय पञ्चमाधिपति गुरु दशमाधिपति सूर्य शक्तिशाली लग्नमा छन्।

सुरक्षा संयन्त्र र सेनापति ग्रह

दशमको मालिक सेनापति ग्रह मंगल निच भई चतुर्थमा गुरुको नक्षत्रमा बसी दशममा उच्च दृष्टि दिएको छ। सप्तम एकादशमा समेत दृष्टि रहने हुँदा देशको बेथिति र विसंगतिले बढाउने भएकाले द्वन्द्व समाधानका निमित्त समन्वयका खातिर सुरक्षा संयन्त्र सक्रिय हुने सम्भावना छ।

यो योग आगामी जेठ २२ साँझसम्म रहनेछ। बुध, शनि, राहु तथा शुक्रसमेत वर्ष लग्नदेखि बाह्रौँ बसेकाले वैदेशिक व्यापारमा प्रशस्तै घाट हुने देखिन्छ।

प्रतिकूल समयावधि

वैशाख २३ गतेसम्म बुध निच भई मीन राशिमा जेठ ४ गतेसम्म राहु र शनि पनि वर्ष लग्नदेखि बाह्रौँ रहने हुँदा समय अत्यन्तै प्रतिकूल हुनेछ।

यो समयमा घरेलु राजनीतिक शक्तिबीच चरम द्वन्द्व हुने, मूल राजनीति तरल हुने, अराजक समूह हावी हुने, राष्ट्र असफलतातिर उन्मुख हुँदै गर्दा विदेशी चलखेल बढ्ने अवस्था सिर्जना होला।

धर्मयुद्ध र सनातनी शक्ति

धर्माधिकारी गुरु अष्टम रहँदाको समय बाह्य विपरीत धर्महरूले राष्ट्रिय धर्मलाई निस्तेज गर्ने गरी घुसपैठ हुँदै गर्दा स्वधर्म बचाउको लागि समान धर्मावलम्वीहरू सशक्त रूपले प्रतिकारमा उत्रने हुँदा धर्म बचाउन युद्ध हुन सक्छ।

अन्ततः २०७१ साउनमै धर्मयुग आरम्भ भइसकेकोले सनातनी शक्तिले विजय हासिल गरी जनचाहनाअनुरूप कार्य गरी देश र प्रजातन्त्रलार्ई अघि बढाउनेछन्।

विश्वव्यापी प्रभाव

शक्तिशाली देश रसिया, बेलायत, जर्मन, जापान आर्थिक उन्नति र आन्तरिक एकताले बलियो हुने योग छ।

चीन, भारत, फ्रान्स शत्रुबाट घेरिनेछ। चीनको कूटनीतिक अवस्था कमजोर, खर्च वृद्घि हुने अवस्था रहन्छ। संंकटका साथै दैवीप्रकोपको सम्भावना, भुटान, भारत, श्रीलंका दैवीप्रकोपको र आन्तरिक कलहबाट संकटमा पर्न सक्छन्।

अमेरिका, अष्ट्रेलिया राजनीतिक समस्यामा परे पनि आर्थिक वृद्घि राम्रै हुनेछ। युरोपियन मुलुकमा आन्तरिक कलहसहित आर्थिक संकटमा पर्न सक्छन्।

राज्य सञ्चालन र राष्ट्रिय शक्ति

राजा सूर्य नेपालको राशिदेखि दशम स्थानको मालिक वर्षलग्नको पञ्चमाधिपति वर्ष लग्नमा, मन्त्री चन्द्रमा मन्त्री देशको राशिदेखि नवाँै स्थानको मालिक जो वर्षलग्नदेखि सप्तम भावमा रहेको ग्रहले राज्य सञ्चालन गर्नेछ।

देशको झण्डा चन्द्र सूर्यअंकित भएकाले अवस्थामा विकृति, विसंगतिलगायत अमानवीय कार्य ध्वस्त भई राष्ट्रलाई शक्तिशाली रुपमा विश्वसामु उभ्याउन सक्ने देखिन्छ।

सत्य र शक्तिको विजय

सेवाग्राही सचेत भई समन्वय गर्दै सत्य र शक्ति नै अघि बढ्नेछन्। सूर्य र चन्द्र राज्यको मुख्य पदमा भएकाले राजनीतिक देशमा शान्ति र अमनचैनका लागि सैन्य शक्ति प्रयोग हुने प्रवल सम्भावना छ।

नेपाल यो वर्ष अत्यन्त दुःखद क्षणलाई सुखद स्थितिमा पुर्याउन निर्णायक अवस्थामा पुग्नेछ। दैवीशक्तिको प्रभाले गर्दा विदेशी शक्ति आफ्नो अनुकूल नहुँदा पनि बाध्यताले जनचाहनाअनुरूप सहज सरल र सुखद मार्गमा जाने वातावरण यसै वर्ष बन्नेछ।

धर्म र राष्ट्रियताको संघर्ष

धर्म र राष्ट्रियतालार्ई गलत व्याख्या गरेर आफ्नो अभिलाषा पूरा गर्दै आएका निस्तेज हुनेछ। सच्चा धर्म र राष्ट्रियता अँगाल्दै गर्दासमेत पिछडिएकाहरू धर्मबल र जनबलले सक्रिय भई हुने दुई शक्तिको टकरावमा देश सैनिकीकरणतिर उन्मुख हुँदा राष्ट्रिय सम्पत्ति विकासमा भन्दा सुरक्षामा बढी खर्च हुनेछ।

राष्ट्रिय, अन्तर्राष्ट्रिय रूपमा पछि परेका शक्तिले पुनः राष्ट्रिय र अन्तर्राष्ट्रिय सहयोग प्राप्त गरी यस वर्ष पुनः स्थापित हुने अवसर प्राप्त गर्नेछन्।